الثلاثاء، 24 يوليو 2012

بعد غيبه

واخيرا بعد 7 اشهر رجعت للمدونه من جديد ....اخر مرة كتبت فيها كانت 1-1-2012 ..واليوم رجعت بعد هالغيبه وتغيرت اشياء كتير بحياتي ..ما بقدر احكي غير انه الحمدلله الوضع من سيء ل اسوأ ..الحمدلله على كل شيء ....
اخر اخباري انه خلصت جامعه وتخرجت وصرت ان جاز التعبير مهندسة مدنيه ...التخرج بيعني انه للاسف حياة الجامعه انتهت ..ومرحلة الجامعه اللي بكون فيها الانسان مش مسؤول عن اي شيء وعايش حياته ومستمتع فيها انتهت ..وبدأنا مرحله جديدة مش معروف اولها من اخرها ..بطاله ..ملل ...زهق ... بأختصار مرحلة سيئه جدا وحاسة انها مش راضيه تخلص ....
حاولت انه اغير من نفسيتي ..كل يوم بصحى بدري على امل انه يصير معي اي شيء جديد بحياتي لكن ...الوضع على ما هو ..
كل يوم نفس الروتين ..بصحى وببعت السيرة الذاتيه اذا كانو طالبين وظائف وبستنى ..حدا يرن ..حدا يبعت مسج .....على الفاضي
يؤسفني انه عايشة حياة انا اصلا ما بحبها ..لانه انا مش هيك وعمري ما كنت هيك ..كنت احب اضلني برا البيت ..بالجامعه ..وارجع اشتغل بالمشروع  واخد دورات بالنقابه ....انشغل ..وانام على طول من التعب ...ما كان عندي وقت فراغ ..
على عكس الحياة اللي بعيشها هلأ ..كلها فراغ ..
وهلأ بما انه عم نعيش اجواء رمضان ..قررت انو ادعي واخلص بالدعاء ..لانه على يقين انه ربنا راح يفرجها عن قريب ...بس كنت عم بفكر  انه من هون لتفرج شو لازم اعمل ؟؟؟؟مش معقول اضلني عايشه هاي الحياة الممله  ...صدقوني شعور مقزز بيخليني اقرف من حالي بس اتذكر انه انا انسانه عاله على  المجتمع وما عم بعمل اشي يفيدني ولا يفيد الناس اللي جنبي ..
مبارح ضايقتني كلمه للدكتور عمرو خالدفي  برنامجه الجديد "عمر صانع حضارة " وقت ما قال  ..طابور البطاله طويل ما راح يخلص ...اتحرك واعمل اي شي وما تضلك قاعد ...!!!
جد  حسيتو بيحكي هاد الحكي الي.....
كيف بيتحرك الانسان ؟؟؟اول خطوات الحركه اللي من خلالها بتتغير الحياة كيف بتكون ؟؟؟ مرحلة البطاله  والفراغ الى متى ؟؟؟؟
باختصار في امل تتغير حياتي وارجع  ل ((ساميه )) القديمه .....
تزكرت كلمة لمحمود درويش بيحكي فيها ...لو كنت غيري لصرت انا مرة ثانيه ...قمت بنشر هذه الجمله على الفيس في محاوله لاقناع نفسي انه انا انسانه لا بأس بها ...لكنني والله كنت اكذب على نفسي ...لانه  لا تعجبني ((ساميه )) الحالية !!!
اعذروني اريد ان اغير قليلا في كلمته الى حين ان اتغير انا ...
""لو كنت غيري ...لصرت اي شخص الا انا ...""
اشعر باني لا اصلح لاي شيء في الوقت الحالي .....
ملاحظه : عذرا وعدتكم بان تكون هذه المدونه مكانا للمتفائلين وللحالمين ...اسمحولي هذه المرة ....فقد ضاقت واستحكمت !!!!!!

هناك 11 تعليقًا:

  1. عادي يا بنت الحلال,محدنش متأمل كتير إلا بنحبط كتير

    إلا ما تتغلبي ت تلاقي شغل مناسب إلك
    وحتى إحتمال تقدمي تنازلات إنه بالمكان والدوام وطبيعة الشغل
    بس بالأخر إلا ما تلاقي شي يفشلك غلك

    صبرك إنتي بس

    ردحذف
  2. ان شاءلله ..بس الوضع صدمني ما كنت متوقعاه هيك :)
    وهيني صابرة وعم بستنى ان شاءلله تفرج عن قريب ..
    شكرا لمرورك ام عمر

    ردحذف
  3. وكليها لربنا و لا تستعجلي رزقك ، اكيد ربنا في اله خطة حاططها الك ، توكلي علي الله و ما تفكري كثير

    ردحذف
  4. صباح الخير يا قمر

    ان شاء الله تكون نفسيتك هلأ احسن...و ان شاء الله تكوني توفقتي بالشغل واذا لسا ربنا ما رزقك الشغل بدي احكيلك اصبري شوي, انبسطي بهالفتره و حطي خطط ومشاريع لحالك ولو حتى كانت فتره كسل وراحه قبل مرحله الشغل

    ربنا يكتبلك كل الخير

    ردحذف
  5. صباح النوووور ...
    اممممم للاسف نفسيتي اليوم محطمممممممممه تماما !!!!!
    انهلكت وانا عم بحاول وعم بدرو على الفاضي ....حاسىة كل الناس عم تبدا حياة جديدة الا انا لسا محلي ...
    المشكله اكتر واحده تعبت وهي عم بتدور على شغل انا ومع هيك ما صحللي وناس غيري بالواسطه اجاها شغل وهي قاعده بالبيت ...هاد اللي قاهرني ...
    مليييييييييت طلعت رووووحي جد مبارح كانت اول مرة بحياتي بتمنى الموووووت على قد ما هي مسكرة بوجهي ...
    احكيلي كيف انبسط ؟؟؟؟كيف اخطط لمشاريع لحالي ؟؟؟

    ردحذف
  6. له له له ....لااااا زين التفاؤل يا صبيه

    انسي الموضوع ولا تفكري فيه....هاي رزقه انتي بتبعتي الطلبات و بتعملي مقابلات و بوقتها و اللي الك راح تاخديه لو مين ما تواسط يتواسط


    فكري بيومك و اعملي خطط الك....ممكن مشروع خيري زي صناع الحياه ممكن تتعلمي شي جديد دوره بتخصصك الهي حالك و لحاله بيجي


    لا تفكري بافكار تشاؤم و ضلي متفائله يا صبيه :)

    ردحذف
  7. والله اذا الك رزقه بمكان و ربنا كاتبلك اياها راح تخذيها غصبا عن راس اكبر واسطة يالبلد ، انت مش عارفه انه الشغل هو رزق من عند ربنا ؟ يمكن انت شايفاها ضيقة عليكي هلا و يمكن مش عارفه من وين راح تنفرج ، بس ربنا بعرف ، وكليها للي هو اعلم بحالك احسنلك و لا تنهمي و لا تسالي ، اعملي اللي عليكي و ربنا ما بضيع تعب حدا ، اذا تنكدتي بتتنكدي لحالك

    ردحذف